[轉載/蘋果日報] 【電視風雲之攞着數】恒基主席李兆基（四叔）長子李家傑昨日獲恒基證實洽購無綫股份。對於六叔邵逸夫一手創立的電視王國有機會易主，無綫一眾花旦小生如楊怡及過氣緋聞情侶佘詩曼和鄭嘉穎等，雖然未敢評論，但希望新老細上場後齊齊加人工。
佘詩曼昨日出席中環Fujifilm Beauty美容產品活動，對於無綫易主消息，阿佘引用羅文主唱的經典劇集《家變》同名主題曲歌詞說：「變幻原是永恒，暫時以不變應萬變，自己好唔捨得，始終TVB咁多年都係跟阿Sir（六叔）。係咪有老細未知，不過最好就加人工啦，最緊要keep到公司製作，對演員嚟講好重要。」
「六叔好有貢獻」
電視廣播（0511）昨日開市不久即宣佈停牌，阿佘笑言自己沒有買股票，只懂買樓投資，記者笑指她日後可向四叔請教投資地產貼士，她笑說：「睇吓點啦。」鄭嘉穎昨日在環球廣場出席活動，對於易主消息，他說：「其實都未落實，我都唔去評論，如果真係換，咁有冇人工加先？成事先至講，因為傳聞成日都有。」無綫另一小生陳豪昨晚與Amanda S.和Ana R.在灣仔君悅酒店出席活動，他也有留意TVB昨日停牌一事，但他揚言未有購買TVB股票。問到有關無綫傳易主一事，陳豪說：「所有嘢言之尚早，決定咗先可以評論。六叔係一個好勁嘅人，對電視同社會都好有貢獻。」
黎耀祥昨日與楊怡在銅鑼灣崇光百貨出席德國孖人牌鍋具活動，對無綫被傳易主一事，楊怡說：「呢個好初步，畀公司去傾，對藝人嚟講最緊要做好自己事，無論點，最緊要加人工，加多啲。」談到明年將有多個免費電視台出現，楊怡認為有競爭才有進步。至於同場的黎耀祥則後悔未有購買TVB股份，他說：「早兩日知嘅話，早啲買就好啦，恭喜有買TVB股份嘅人。」對於無綫被傳易主，祥仔笑言涉及90億的交易，他沒資格評論。
呂慧儀誓死效忠
呂慧儀和馬德鐘昨日到銅鑼灣出席男士內衣展，呂慧儀悉心打扮谷胸上陣，十分養眼。呂慧儀表示如果易主的話，她希望有人工加，並自言會誓死效忠無綫，她說：「我唔會離開，怕麻煩，我食TVB嘅飯，家好好，除非有人娶我先離開。」呂慧儀表示早前有買入無綫股票，亦有不少斬獲。
馬德鐘表示希望有更多電視台出現，才能令電視業更加百花齊放及有良性競爭，他透露與無綫還有一年合約，但續約問題未詳細斟洽。
採訪：張俊銘、楊潔雯
攝影：陳慧安、陳俊強、黃文偉
YouTubeHK 精選影片 www.youtubehkvideo.com [主頁] [最新影片]
