[轉載/蘋果日報] 現年50歲嘅鍾楚紅（紅姑）近年深居簡出，好少出席公開活動，不過噚日佢就現身台灣擔任法國珠寶Chaumet嘅新店開幕嘉賓。紅姑前日抵台時，趁活動前夕先到中山北路附近食台菜，着住黑色薄身泰山裝嘅佢戴住墨鏡，引嚟現場閃光燈狂閃，紅姑竟然老貓燒鬚透出內裏嘅白色bra，認真惹火。
穿紅裙有掙扎
休息咗一晚，噚日紅姑悉心打扮出席珠寶店開幕禮，佢着上Valentino紅色長裙，戴住價值4,300萬新台幣嘅黃鑽小皇冠，成個王妃咁。紅姑喪夫3年，據知佢初初對着紅色晚裝都有掙扎，但因為出嚟嘅效果好靚，又配合場合，所以紅姑最後都照着。不過，現場發生咗小插曲，紅姑嘅禮服一度滑落至肩膊，不過見慣大場面嘅佢好淡定，笑笑口咁火速整理好衣服。
紅姑淡出影壇已19年，佢強調無意復出拍戲，又否認會定居巴黎。佢又話家有好多愛情，但就唔係異性：「現在生活重心是愛，是對環境、朋友和周遭事物。現時生活仍不夠自在，因為媒體還是經常會關注我。」
YouTubeHK 精選影片 www.youtubehkvideo.com [主頁] [最新影片]
