[轉載/蘋果日報] 買起山頂只要400萬元？唔係時光倒流，只係經典遊戲「大富翁」冇與時通脹啫，因此山頂都只係天匯廚房價。今個月推出、慶祝遊戲面世75周年嘅「香港景點版大富翁」，山頂穩坐「地王」寶座，在遊戲中賣400萬元。
海洋公園打敗迪士尼
今年初舉行「香港景點版」景點網上選舉，有萬多人次投票，有一成幾人投票山頂，令佢蟬聯「地王」。當美孚有曼克頓山，佐敦有凱旋門，傳統豪宅地段淺水灣唔矜貴，被青馬大橋取代，在呢副香港景點版大富翁中落榜。
新上榜嘅景點仲有星光大道、挪亞方舟、維多利亞港、文化中心、蘭桂坊、昂坪360等新興旅遊景點，呢啲景點，在遊戲中售價只係賣240萬至350萬，銀碼低過市區上車盤，80後買唔起蝸居，可以考慮暫時移情大富翁，紙上富貴過吓癮。
呢次網上投票選情激烈，尤其係排名第20位以後幾個景點，票數叮噹馬頭，以些微票數之差落選嘅，包括李超人旗下尖沙嘴1881 Heritage，反而對面街嘅文化中心上榜。同所謂仇富、仇商情緒有冇關係呢？抑或係因為1881唔畀人隨便入去影相而乞人憎呢？
香港官員以割地迪士尼為榮，香港人似乎唔係咁睇，因此土炮主題公園海洋公園入圍，洋貨冇份，本地薑威威獅令撼贏米奇老鼠，不枉盛智文成日瞓身扮鬼扮馬做宣傳。最新版香港景點版大富翁有嚤囉街、蘇豪、石板街等中區特色街道，八方知道因《歲月神偷》揚名，獲市建局破格保留嘅永利街都在候選名單之上，可惜僅僅落選，不能再次揚威。
新版大富翁用儲值卡
以前玩大富翁有數銀紙趣味，家人人習慣嘟一嘟就畀錢，新版大富翁亦全面電子化，以儲值卡代替銀紙，刷刷卡就買起成條街，又豪又爽。呢副充滿香港特色嘅大富翁，首批7,500副有獨立編號，遊戲用嘅棋子，以尖沙嘴鐘樓、電車、山頂纜車站、熊貓等象徵香港嘅事物為造型，其中75副特別號碼本月26號在尖沙嘴玩具反斗城發售。
YouTubeHK 精選影片 www.youtubehkvideo.com [主頁] [最新影片]
