[轉載/蘋果日報] 無綫總經理陳志雲日前俾廉政公署正式落案起訴，曾捲入涉貪事件、但上月獲廉署撤銷擔保嘅無綫藝人寧進早排就被爆經濟出問題，賣樓、賣酒吧又賣車，佢位於尖沙嘴嘅酒吧前晚結業，寧進同朋友喺酒吧通宵狂歡，仲將相片上載微博。
「陳生將心事收埋」
寧進噚日喺電話否認經濟唔掂，佢話：「我係賣樓同賣酒吧，因為兩樣都有錢賺，但就冇賣車，我經濟冇問題。」雖然前晚陳志雲冇到，但寧進話自己日日有同佢通SMS：「佢次次都係叫我哋唔好擔心，仲話會約我食飯，其實陳生將好多心事收埋，唔會亂同人講，我都算佢身邊其中一個可以分享嘅人。」
鄺美雲：會關心佢
另外，曾傳係迷雲黨嘅馬浚偉，噚日喺鑽石山出席親子活動，講到王喜話必要時會賣樓撐陳總，馬仔就話：「佢一直都係一個好有能力嘅人，TVB都有好多其他同事關心佢，有乜事其實心入面支持就夠。」
有指陳志雲經濟出問題，志雲好友鄺美雲噚日喺坑口出席活動時話：「唔應該問嘅嘢係唔會問，我唔會為難佢，只會關心佢。」
至於薛家燕噚日都撐陳志雲經濟冇問題，有傳陳志雲為方逸華進行秘密任務，薛家燕就話：「我信，陳生一路跟開咁多嘢，又咁熟悉公司，尤其同方小姐關係好密切，好多嘢應該佢跟番。」
YouTubeHK 精選影片 www.youtubehkvideo.com [主頁] [最新影片]
