[轉載/蘋果日報] 小妹早輪睇報紙，東莞有個港商揸住部美國 Bell 206直升機追賊，技驚四座。唔知係咪呢單新聞響晒朵，舊年 12月先攞到 Bell直升機中港澳地區總代理嘅華運航空，最近引入被譽為有史以嚟最新、最先進嘅輕型雙發直升機 Bell 429，進軍香港巿場。小妹噚日去到石崗，見識吓呢部直升機。
Bell亞太區商業發展經理黃志明話， Bell 429特點係容易控制，採用較罕見嘅 LED儀器錶板，機師操控時飛行數據一目了然，「同級直升機一般要用兩個機師，呢部一個就可以」。
較同級機種省油三成
另一個賣點是機艙豪華舒適，全機連機師可坐足八個人，機尾及機側設行李艙，其中機尾行李艙，可用作運送病人，他說：「呢部機除可作私人商業或休閒用途，還可用作醫療直升機。」該機加滿油可飛四個小時，耗油量較同級機種節省三成。
小妹現場所見，有直升機駕駛執照嘅名媛趙式芝都喺度睇機。佢話，自己有部 Robinson R44直升機，但只有四個座位，今次想買一部大啲嘅。
小妹去試坐，其中一個機師原來係王敏德，佢話揸過四款直升機，惟第一次揸 Bell 429，好易上手，機艙好少見咁闊。小妹坐機來回石崗到維港，都唔使 15分鐘，飛得好平穩，又唔覺得好嘈，機窗好大，睇景一流。
Bell 429今年全球已付運 20部，亞太區佔 40%，內地已有商人購買，近日進軍香港，唔少富豪都話好有興趣。問吓價錢，楊總話， 650萬美金，折合港幣 5,070萬元，小妹得過恨字。
YouTubeHK 精選影片 www.youtubehkvideo.com [主頁] [最新影片]
