[網熱] 抱狗港女反擊司機毒誓證清白

隔牆有耳:抱狗港女反擊屈拒載 全港的士司機笑爆嘴 2010年09月09日


[轉載/蘋果日報] 早排《蘋果》報道網上流傳一段短片,內容係一名帶狗女乘客報警話的士司機拒載,事件引起網民極大迴響,指摘女乘客阻住司機搵食,因為根據法例司機係有權拒載動物。
「抱狗港女」被網民起底,原來係寵物店老闆,芳名鍾麗鈴,鍾小姐日前發表公開信大反擊,指的士司機嫌佢由北角去銅鑼灣路程太短而拒載,又話當日抱住嘅哥基犬有病,趕住睇獸醫,點知司機爆粗鬧佢,情急下報警求助。
正所謂真理越辯越明,八方就這段路程問過市區的士司機聯委會永久榮耀會長郭志標,佢大大聲話:「北角落銅鑼灣點可能會拒載!落到銅鑼灣就係天堂,大把客!」有網民則反問鍾小姐:「要帶隻狗去睇醫生都唔落車搞成個鐘頭?你有幾緊張隻狗呀?」
男主角網名 V仔嘅的士司機喺網上討論區回應:「佢講咗個全港的士司機都會大笑嘅大話,因為北角去銅鑼灣,執到金咁開心!」 V仔發毒誓從來唔知鍾小姐目的地,亦冇粗口辱罵對方,又指對方既然係寵物店老闆,冇可能唔知的士司機可以拒載寵物。八方相信心水清網民都知誰是誰非, V仔慨嘆:「我放佢一馬,佢恩將仇報,自取其辱!」


YouTubeHK 精選影片 www.youtubehkvideo.com [主頁] [最新影片]
Related Posts Plugin for WordPress, Blogger...