[轉載/蘋果日報] 今個星期三除係「無車日」，綠色和平噚日搞咗個「無車日單車行」前哨活動，呼籲市民減少使用私家車，多啲用零排放嘅兩個轆代步。噚日又焗又熱，但都無損環保人士嘅決心，近900人由中環踩單車來回北角，人數比舊年勁增8倍。
「無車日」或有雨
至於無車日當日，話咗會響應嘅煲呔當日會點返工呢？綠色和平項目經理古偉牧引述政府回覆話，煲呔會「喺可步行距離內唔用私家車」。據了解，煲呔照計會跟番舊年嘅做法，由禮賓府行落政府總部開早禱會，全程約500米。
仲記得舊年唐唐約埋黃仁龍一齊搭一架的士返工。政府發言人就話，當局會繼續支持無車日，但各高官當日到底會搭小巴的士或者行路返工？家仲未知點搞。
天文台預告，星期三天氣唔多好，間中有雨。八方估計煲呔同佢手下班高官當日好可能會坐番私家車，事關落雨喎，大家幾時見過特首或者高官喺落雨時自己擔遮，「落雨」就令到所有距離都唔係「可步行距離」啦。
YouTubeHK 精選影片 www.youtubehkvideo.com [主頁] [最新影片]
