[轉載/蘋果日報] 周杰倫上個禮拜嚟香港開一共八場演唱會，噚日中秋節佢同做嘉賓嘅浪花兄弟一齊去福臨門食晏，聽聞周董噚日係約咗楊受成傾合作拍戲嘅事，因為周董想開拍《熊貓人》電影版，呢部戲投資好大，所以除咗旺旺老闆蔡衍明可能會投資外，周董都四圍搵其他資金，據知英皇可能都想投資一份。
大劉木無表情
另外，劉鑾雄周日同甘比、媽咪提早過中秋節團圓後，噚日又約咗甘比食晏，睇嚟大劉冇因為呂麗君幫佢再生多一個仔，就冷落甘比。噚日大約一點鐘甘比着住短裙、紅鞋同拎住個紅色鱷魚皮Hermès手袋嚟到福臨門，十分鐘後就見到大劉出現。
記者當時問大劉，李嘉欣有咗BB有冇恭喜佢？佢聽到之後，木無表情，例牌對一切提問都冇回答，然後匆匆走入酒樓，大約3點幾，佢哋兩個一齊食完晏出嚟，大劉護住甘比先上車離開，然後自己就坐另一部車走咗。
福臨門係名人飯堂真係冇假，大劉食完晏，許世勳夫婦噚晚約7點15分到咗呢間富豪飯堂食飯過中秋節， 問兩位老人家嘉欣有身孕嘅事，佢哋就冇乜回應。5分鐘後見到佢個仔許晉亨單拖到達，問佢點解老婆嘉欣冇一齊嚟過節？佢只係笑笑口急步入酒樓，一樣係封口，乜都唔肯答。
噚日朱潔儀、黃百鳴個女黃漪鈞都先後喺福臨門出現，但問佢哋約咗乜人食晏，同樣冇回應。
YouTubeHK 精選影片 www.youtubehkvideo.com [主頁] [最新影片]
