[轉載/蘋果日報]
幾乎被腰斬嘅港台節目《頭條新聞》最終逃出生天，聽晚起逢星期五晚7點喺無綫翡翠台播出。奇蹟生還當然要搞搞新意思，倖存嘅太后森叔同小豪子曾志豪喺首集舉行「國慶御廚大賽」慶祝健在，周澄同何秀蘭更加犧牲色相，前者搞咗個爆炸頭化身女版火雲邪神，後者就化身女版龍劍飛，同林超榮、羅啟新嘅「女子組」以廚藝論政。雖然造型極爆，但係菜式未獲評判劉夢熊同陳雲歡心，最終敗於陰陽怪氣嘅女子組手上。
網上人氣爆燈嘅「廣州周星馳」溫超應邀南下贈興，喺節目中以星爺食神造型點評菜式。平時有睇開《頭條新聞》嘅溫超話，知道自己喺香港好hit，如果港人鍾意佢，好希望嚟香港發展。
煲呔搭通閻羅王
劉夢熊就喺節目中爆料，話私底下同煲呔傾開菲律賓人質事件時，煲呔表明人命攸關，不論有冇次主權、身份地位，就算係閻羅王都會照打電話要求營救，即時令太后爆頭，事關煲呔身為天主教徒，搭通天堂條線唔出奇，打落下面都得嘅咩？
YouTubeHK 精選影片 www.youtubehkvideo.com [主頁] [最新影片]
