[轉載/Youtube] August 26, 2010
(蘋果日報隔牆有耳)馬尼拉港人八死慘案，菲律賓政府初期卸責，菲警行動又錯漏百出，引起公憤。但成龍居然「獨排眾議」，繼發表「中國人還是要被管的」嘅奴才論之後，今次喺 twitter幫菲律賓警方講說話，話無論警方遲或早擊斃槍手，都有人批評，菲律賓當局對成龍「諒解」好受落，話多謝晒，但香港網民就㷫爆，更有高登友貼圖抗議。成龍個「推特」（ twitter）噚日出現英文留言，包括話"this kind of things always happen around the world. It happened to hk's people, the whole hk is talking about it. Its really sad.（「呢啲事喺世界上成日發生，今次發生喺香港人身上，全香港都討論緊呢件事。真令人難過。」）又話"HK is a nation built by a lot of different people..don't worry! We do not hate!"（「香港係多元種族社會，唔使擔心，我哋唔會仇恨。」）八方亦同意唔應該因為馬尼拉慘案遷怒所有菲律賓人，更絕對唔想見到因為咁引起種族仇恨。但成龍 twitter呢一句就出事："If they killed the guy sooner, they will say why not negotiate first? If they negotiate first, they ask why not kill the guy sooner? So sad"（「如果警方早啲擊斃個脅持者，啲人會話點解唔談判咗先？如果警方談判先，啲人又會問點解唔一早殺咗個脅持者？真悲哀。」）言下之意，即係話菲律賓警方點做都有人鬧 o架啦，係咪暗示港人無理取鬧呢？成龍嘅推文仲獲得菲律賓同外國傳媒報道，中央社更引述菲律賓總統府發言人話：「謝謝成龍。我們希望香港的民眾也能像你一樣，向我們伸出友誼之手。」不過，香港網民就鬧爆成龍，高登討論區更出現一張相，據講係美孚民眾回應成龍嘅「大字布」，寫着「成龍先生更可恥」，鬧成龍衰過菲律賓總統，話成龍不代表香港人。八方打電話去問過成龍助手，助手話大哥唔喺香港，佢嘅 twitter平時有人打理，至於呢啲留言係咪成龍親自寫，同其實想講乜，至截稿前成龍嗰邊都冇覆八方。
網民齊聲罵成龍
【明報專訊】hi-tea﹕一個是非不分的所謂公眾人物。請問成龍先生有勇氣面對遇害者家人再說一次這番說話嗎？強烈要求成龍向受害人家屬致歉。
香江俠女﹕陳生你有咩資格代表全香港人？我哋何時委派你做代表？
Yuetlo﹕佢代表我哋？佢憑乜代表我哋？莫非係因為佢犯咗佢所謂既全港男人犯既錯就可以代表我哋！
buzz光年﹕死咁多人咩都冇問一句，就出嚟扮代表。這時都重抽水擦鞋，正一蛋散。
李浩賢﹕抽水成功，菲律賓人齊讚成龍。
pui119715﹕大哥唔係大晒o架。講嘢之前有無諗過所有受害者及家屬，重叫人伸出友誼之手！
aimar11﹕我哋依家做晒醜人啦！成龍你最明白事理啦，好未呀！
唯愛飛輪海﹕成龍返菲律賓啦！香港唔啱你呀！
YouTubeHK 精選影片 www.youtubehkvideo.com [主頁] [最新影片]
