[轉載/蘋果日報] 千元法式雪糕月餅 sell勁脆 2010年08月27日
月到中秋份外圓，唔夠一個月就係中秋節，見到菲律賓呢單脅持事件都幾欷歔，每年可以同家人齊齊整整過中秋，係一種福氣。今年想買啲特別又矜貴嘅月餅孝敬屋企人，就想起 Haagen-Dazs，佢哋啱啱推出全城最貴嘅法式雪糕月餅「金醉」。
首次選用綠茶雪糕
小妹噚日搵咗 Haagen-Dazs巿務總監鄒斐娜（ Shirley），試吓啲新款雪糕。 Shirley笑笑口話，今年推出七款禮盒裝雪糕月餅，當中傳統加少少變奏嘅月餅有 4件裝嘅「玲瓏心意」，選取呍呢嗱雪糕，代替舊年嘅士多啤梨味； 6件裝嘅「月滿心意」，除咗有朱古力、士多啤梨味，仲徇眾要求首次選用較貴嘅綠茶雪糕，「綠茶原材料嚟自日本京都，再送到法國用石磨磨成粉，製成嘅雪糕特別香滑細膩」。
Shirley又話，今年全新禮盒月餅大 sell矜貴勁脆，好似全球首創嘅 20件裝金醉月餅，其中 4件法式脆心雪糕月餅 Tartufo，製法係將杏仁焗脆炒香，用糖衣包住，再混合呍呢嗱雪糕； 16件迷你月餅採用 999.9純度嘅噴金，部份仲加埋金箔果仁粒，「售價$1,000，係公司歷來最貴月餅，限售 1,000盒。」
6件裝「圓滿臻萃」首創用威化做外層，代替傳統朱古力脆皮，夾住牛奶朱古力或焦糖脆皮同雪糕，「最難係零下 23度威化都係咁脆」。小妹即試兩款，啲杏仁同威化真係好鬼脆。 Shirley話雪糕月餅好受中產同年輕人歡迎，估計生意額會比舊年升四成。
YouTubeHK 精選影片 www.youtubehkvideo.com [主頁] [最新影片]
