隔牆有耳：香港豬扒成國際焦點 2010年08月06日
[轉載/蘋果日報] 俗語話醜事傳千里，八方補充一句，醜女一樣可以傳千里甚至萬里萬萬里，應屆香港小姐冠軍陳庭欣最近就「一醜天下知」，連美國有線新聞網絡旗下嘅網站 CNNGo（都有報道，標題係：'Porkchop' pageant: Who is the ugliest Miss Hong Kong?（http://www.cnngo.com）豬扒盛會：邊位係最醜港姐？）
facebook群組狠批
報道提到今屆港姐有唔少負面新聞，例如冠軍陳庭欣爆冷奪冠，莊思明又喺噓聲中成為季軍，引發連串賽果內定傳聞。不過報道話最令網民唔順氣嘅，始終係陳庭欣同莊思明嘅「豬扒」指數高企，有網民更喺 facebook成立「醜八怪.香港豬扒.陳庭欣」群組狠批今屆港姐選舉，又有內地網誌介紹陳庭欣時，仲起底數埋歷屆豬扒港姐出嚟。
八方上個群組睇過，發起人其實又唔係針對港姐佳麗嘅，成立群組目的仲好正氣，話係要「打壓造假的風氣，讓真正有質素的參賽者得到公平的競賽機會，亦要公開權貴勾結黑暗的一面」。至於嗰篇數歷屆豬扒港姐嘅內地網誌，就列舉咗張嘉兒、向海嵐、徐子珊同楊婉儀等港姐冠軍，當中以莫可欣豬扒指數最高，有六粒星。
刊登大牙肉 look
香港小姐標榜美貌同智慧並重，但網民對港姐有要求無可厚非，偏偏 TVB港姐網頁揀咗陳庭欣嘅大牙肉 look做介紹相， CNNGo用番呢張相，表明並冇梗硬搵張肉酸相砌人生豬肉。查實陳庭欣都自認笑得唔好睇，如果 TVB網站換番張表現佢煞食造型照，大家或者會改變睇法都唔定。
TVB早排播《談情說案》被指老翻日劇《神探伽俐略》，引起外國傳媒關注，今次豬扒港姐又被炒上 CNN，八方建議旅發局頒個獎畀 TVB，表揚佢哋經常製造國際笑料，令更多老外認識香港。
