[轉載/蘋果日報] 自傳出港台節目《頭條新聞》可能撤換主持吳志森同曾志豪嘅消息之後，網民群情洶湧，有人即刻設立咗個「我撐『頭條新聞』！要求立法保障獨立公共廣播！」專頁，至噚晚已經有過千人「讚好」。由記協、人權監察等組成嘅「撐港台運動」今日亦會去港台，要求同廣播處長黃華麒公開對話。
團體要與黃華麒對話
以嬉笑怒罵風格針砭時弊嘅《頭條新聞》向來連特區政府都冇面畀，高官唔啱都照寸照鬧，一直被視為港台獨立性嘅標竿，近日卻傳出麒叔要求撤換主持吳志森同曾志豪嘅消息，令關心香港言論自由同公共廣播獨立性嘅市民好緊張，有網民留言疾呼：「畀番太后同小豪子我！」
「撐港台運動」就不滿政府早前懶理市民意見，強行保留港台做政府部門，又頒佈《香港電台約章》，為箝制港台預設陷阱；黃華麒理應捍衞港台編輯自主同公共廣播原則，但佢耳中似乎只聞上司聲，匆匆簽約，令港台員工極度憤慨同失望，更令人質疑黃華麒係咪適合領導港台履行公共廣播責任。
佢哋今日會上港台，要求同麒叔即時對話，要佢解釋喺《約章》草擬、諮詢同簽署過程中，點保障港台編輯自主、點重建同員工關係，以及現有顧問委員會嘅存廢問題。
YouTubeHK 精選影片 www.youtubehkvideo.com [主頁] [最新影片]
