隔牆有耳：惡珍同情分勝八達通一姐 2010年08月02日
[轉載/蘋果日報] 本港近日有兩位中女掀起全城熱話，一個係惡導遊阿珍（李巧珍），另一個係八達通公司 CEO陳碧鏵。惡珍因為鬧爆內地旅客嘅短片喺大陸熱播，連北大人都要出來港旅遊警告，搞到阿珍上星期現身鞠躬道歉；後者陳碧鏵身為八達通一姐，出賣港人私隱賺幾千萬仲講大話，最後公司大股東港鐵嘅高層都要出嚟道歉。
撐阿碧話都係打份工啫
呢個世界其實冇嘢係唔可以原諒，八方嘅同事噚日就做咗個簡單嘅民調，喺觀塘同灣仔街頭訪問咗 42位市民，問吓佢哋如果有得揀，會原諒阿珍定阿碧。結果曾經聲淚俱下道歉嘅阿珍獲得最多人同情，有 31人撐佢話可以原諒，開頭死不認錯嘅阿碧只得 11人揀佢。睇番男女比例，原來較多男人會揀同情阿珍，揀阿碧嘅就女人多啲。撐阿珍嘅顏小姐話，阿珍只係鬧人，但陳碧鏵就講大話出賣市民嘅個人資料，好難原諒佢。
亦有市民話，阿珍都係零團費制度下嘅產物，加上佢爸爸中風，生活逼人好慘情，而且佢鬧人段片冇前冇後未必全面，既然佢已經道咗歉就值得原諒。至於撐阿碧嘅市民就話，佢都只係打份工幫股東搵錢，今次好明顯係要孭晒鑊好值得同情，而且會賣市民資料嘅，全香港一定唔止八達通一間公司。
兩個女人做錯事之後又道歉，公關顧問馮煒光點評話，陳碧鏵嘅公關策略大錯特錯，身為一間公司嘅 CEO，竟然喺明知有做錯嘅情況下，開頭一直唔肯認錯，到最後俾人查時先肯低頭，咁樣前言不對後語，好難令人接受。馮煒光又話，阿珍成個形象畀人好小人物、好基層，而且好明確咁俾人聯繫到，佢嘅錯亦同制度有關，相對容易令人接受佢嘅道歉。
明白阿珍事件關乎制度
立法會議員李卓人就話，畀佢揀一定覺得陳碧鏵難以原諒，因為佢一早就知公司真係有賣資料畀人，但直到俾人查嗰陣先肯認錯，即使道歉，市民亦好難以再信佢。至於阿珍，阿人就話佢鬧人件事本身已經衰到貼地，亦冇嘢可以隱暪，所以出嚟道咗歉之後大家都冇咁激氣，都會明白件事同制度都有關係。點都好，八方好希望兩個中女嘅錯事唔會再發生，大家都引以為鑑就好喇。
