蘋果日報 - 20100809 - 隔牆有耳：高齡產婦贏「最靚孕媽媽」
[轉載/蘋果日報]香港女性普遍遲婚，生兒育女更加諗清諗楚。 40出頭嘅黃靖淇冇有怕，噚日以大家姐姿態力壓群媽，贏得今屆「全港最靚孕媽媽選舉」冠軍。
15個進入決賽嘅準媽咪，平均年齡 30出頭，論年齡佢排第一。荷花集團行政總裁尤金形容黃靖淇好有古典美，表現淡定，最重要係佢同台下撐場嘅老公，一直保持 sweet sweet嘅眼神接觸。
從事保險業嘅黃靖淇話，因工作纏身，兩年前先搵到佢嘅甜心先生，家再嚟組織三人世界。佢話醫學昌明，遲啲生 BB一樣掂。
保安局局長李少光嘅新抱方燕凌，舊年贏得亞軍同全場最靚媽咪大獎。佢噚日同老公李霖恩、囡囡全家一齊出席。仲話會隔日就湊囡囡去老爺度，等李少光多啲時間過爺爺癮。
